དུས་ཚོད།：2018-06-05 19:54:08 རྩོམ་སྒྲིག： འབྱུང་ཁུངས།：ཀྲུང་གོའི་བོད་སྐད་རླུང་འཕྲིན་དྲ་བ།

  ༢༠༡༨ལོའི་ཟླ་༥པའི་ཚེས་༣༠ཉིན། མཉམ་འབྲེལ་རྒྱལ་ཚོགས་སློབ་གསོ་ཚན་རིག་རིག་གནས་རྩ་འཛུགས་ཀྱི་འཛམ་གླིང་དྲན་ཤེས་ལས་གཞིའི་ཨེ་ཤ་ཡ་དང་ཞི་བདེ་རྒྱ་མཚོ་ཆེན་མོ་ས་ཁུལ་ཨུ་ཡོན་ལྷན་ཁང་གི་ཚང་འཛོམས་གྲོས་ཚོགས་སྐབས་བརྒྱད་པའི་ཐོག བོད་ཀྱི་གསོ་རིག་སྨན་གཞུང་གྲགས་ཅན་༼རྒྱུད་བཞི་༽ཉིད་འཛམ་གླིང་དྲན་ཤེས་ཞེས་པའི་ཨེ་ཤ་ཡ་དང་ཞི་བདེ་རྒྱ་མཚོ་ཆེན་མོ་ས་ཁུལ་གྱི་མིང་ཐོའི་ཁྲོད་བདམས་འདུག

    ཉེ་བའི་ལོའི་རིང་།  བོད་ཀྱི་གསོ་རིག་འདི་ཉིད་རྒྱལ་སྤྱིའི་གར་སྟེགས་སུ་འཛེག་འགོ་ཚུགས་ཡོད་པ་དང་།    ཐེངས་འདིར་༼རྒྱུད་བཞི་༽ཉིད་འཛམ་གླིང་དྲན་ཤེས་ཀྱི་མིང་ཐོའི་ནང་ཚུད་པ་ཡང་རྒྱལ་སྤྱིའི་སྤྱི་ཚོགས་ནས་བོད་ཀྱི་གསོ་རིག་ལ་སྔར་ལས་ལྷག་པའི་ཁས་ལེན་དང་གདེང་འཇོག་ཐོབ་པ་མཚོན་ཞིང་། འདིས་བོད་ཀྱི་གསོ་བ་རིག་པ་འཛམ་གླིང་དུ་ཁ་ཕྱོགས་པར་རྨང་གཞི་བརྟན་པོ་བཏིང་བ་དང་།གསོ་རིག་འདི་ཉིད་འཛིན་སྐྱོང་སྤེལ་གསུམ་བྱེད་པར་རྒྱལ་སྤྱིའི་གར་སྟེགས་བསྐྲུན་ཡོད།   

     འཛམ་གླིང་དྲན་ཤེས་ཟིན་ཐོ་རུ་བདམས་པའི་ཡིག་ཚགས་ཁག་ནི་འཛམ་གླིང་ཡོངས་ལ་མཚོན་ན་དོན་སྙིང་ངེས་ཅན་ལྡན་པ་ཤ་སྟག་ཡིན་ཞིང་། དེ་ནི་མཉམ་འབྲེལ་རྒྱལ་ཚོགས་སློབ་གསོ་ཚན་རིག་རིག་གནས་རྩ་འཛུགས་ཀྱི་འཛམ་གླིང་དྲན་ཤེས་ལས་གཞིའི་རྒྱལ་སྤྱིའི་འདྲི་གཅོད་ཨུ་ཡོན་ལྷན་ཁང་གིས་འདེམ་བཞིན་ཡོད།    འཛམ་གླིང་དྲན་ཤེས་ཀྱི་ཡིག་ཚགས་ལས་གཞི་ནི་འཛམ་གླིང་གི་ཤུལ་བཞག་རིག་གནས་སྲུང་སྐྱོང་ལས་གཞིའི་རྒྱུད་མཐུད་ལས་གཞི་ལྟ་བུ་ཡིན་ལ།     དེའི་ནང་དུ་རྟེན་མཛོད་ཁང་དང་ཡིག་ཚགས་ཁང་།   དཔེ་མཛོད་ཁང་སོགས་རིག་གནས་ལས་རིགས་ཚན་པས་ཉར་ཚགས་བྱས་པའི་རིན་ཐང་བྲལ་བའི་ཡིག་ཚགས་དང་།   ལག་བྲིས་ཡིག་ཆ།    ངག་རྒྱུན་གྱི་ལོ་རྒྱུས་ཟིན་ཐོ་སོགས་གནའ་བོའི་ཡིག་ཚགས་རྩ་ཆེན་སོགས་འདུའོ།།

ཡོང་ཁུངས། ཀྲུང་དབྱང་རླུང་འཕྲིན་བརྙན་འཕྲིན་སྤྱི་ཁྱབ་ལས་ཁུངས།

རྒྱུད་བཞི། 

    རྒྱུད་བཞི་ནི་རྩ་བའི་རྒྱུད་དང་། བཤད་པའི་རྒྱུད། མན་ངག་རྒྱུད། ཕྱི་མ་རྒྱུད་བཅས་ལ་བྱ་ཞིང་། དེ་ཡང་རྩ་བའི་རྒྱུད་ཅེས་པ་གང་ཟག་བློ་རབ་ཀྱི་དོན་དུ་གསོ་བ་རིག་པ་ཐམས་ཅད་ཀྱི་དོན་ས་བོན་གྱི་ཚུལ་དུ་སྨོས་པ་ཚིག་ཉུང་ངུའི་སྒོ་ནས་གསོ་རིག་གི་དོན་རྒྱ་ཆེན་པོ་མདོར་བསྡུས་ཏེ་སྟོན་པས་ན་རྩ་བའི་རྒྱུད་ཅེས་སོ།།

    བཤད་པའི་རྒྱུད་ཅེས་པ་གང་ཟག་བློ་འབྲིང་གི་དོན་དུ་གསོ་བ་རིག་པའི་དོན་ཐམས་ཅད་གནས་བཅུ་གཅིག་ཏུ་བསྡུས་ནས་རྩ་བའི་རྒྱུད་དུ་རྒྱས་པར་མི་གསལ་བ་རྣམས་གསལ་བར་བཤད་པ་དང་། གསལ་བ་རྣམས་སུ་མ་ཚང་བ་ཁ་བསྐངས་ཏེ་བཤད་པ། ཆ་མཐུན་པ་རྣམས་ཀྱང་དོན་ངེས་ཤེས་བསྐྱེད་དེ་བཤད་པ། ཚིག་དོན་འགའ་ཞིག་འཐོར་བ་རྣམས་བསྡུས་ཏེ་བཤད་པ། བསྡུས་པ་རྣམས་རྣམ་པར་ཕྱེ་ནས་བཤད་པ་སྟེ། འཐོར་བ་སྡུད། འཁྲུགས་པ་བསྡེབས། གབ་པ་མངོན་དུ་ཕྱུངས་ནས་གསོ་དཔྱད་ཀྱི་དོན་ཐམས་ཅད་བཤད་ཐབས་ཀྱི་སྒོ་ནས་གཏན་ལ་འབེབས་པ་བཤད་པའི་རྒྱུད་ཅེས་སོ།།

     མན་ངག་རྒྱུད་ཅེས་པ་བློ་ཐ་མའི་དོན་དུ་བརྗོད་བྱ་གསོ་ཡུལ་ཡན་ལག་བརྒྱད་ལ། རྗོད་བྱེད་གསོ་ཐབས་སྐབས་བཅོ་ལྔའི་ལག་ལེན་མཛུབ་ཚུགས་སུ་ནད་རེ་ལ་རྒྱུ་རྐྱེན་དབྱེ་བ་རྟགས་དང་བཅོས་ཐབས་སྤྱི་དང་བྱེ་བྲག་རྣམས་ཕྲ་ཞིབ་རྒྱུ་མཚན་དང་བཅས་ཏེ་མན་ངག་ལག་ལེན་དམར་ཁྲིད་ཀྱི་སྒོ་ནས་གསལ་རྒྱས་རྫོགས་པར་གཏན་ལ་འབེབས་པ་མན་ངག་རྒྱུད་ཅེས་སོ།།

    ཕྱི་མ་རྒྱུད་ཅེས་པ་བློ་ཤིན་ཏུ་དམན་པ་རྣམས་ཀྱི་དོན་དུ་མདོ་བཞི་རུ་གྱེས་ནས་ཚིག་དོན་གཉིས་ཀ་རྒྱས་བསྡུས་འཚམ་ཞིང་རྟོགས་སླ་བ་དང་། ལག་ལེན་རྣམས་ཀྱང་ཤིན་ཏུ་འཁྱེར་བདེ་ཞིང་དོན་གསལ་ལ་གནད་དུ་དྲིལ་བའི་ཚུལ་དུ་གཏན་ལ་འབེབས་པ་ཕྱི་མའི་རྒྱུད་ཅེས་བྱ་བ་དང་། དེ་ལྟ་བུའི་རྒྱུད་བཞི་འདིར་གསོ་དཔྱད་ཀྱི་དོན་ཐམས་ཅད་བསྡུས་ཏེ་ཚང་བར་བསྟན་པའོ།།

དཔྱད་གཞིའི་ཡིག་ཆ།

   བྱམས་པ་འཕྲིན་ལས་སོགས་ཀྱིས་བསྒྲིགས་པའི 《ཀྲུང་གོའི་གསོ་རིག་ཀུན་འདུས་ལས་བོད་ཀྱི་གསོ་བ་རིག་པ》 ཀྲུང་གོའི་བོད་རིག་པ་དཔེ་སྐྲུན་ཁང་། 1998ལོའི་ཟླ8པར་དཔར།